Góð afkoma og traustari fjárhagur OR
13. okt 2015
Orkuveitan
Festa í rekstri Orkuveitu Reykjavíkur (OR) og dótturfélaga mun skila góðri afkomu og traustari fjárhag á næstu árum þrátt fyrir talsverðar fjárfestingar. Fjárhagsáætlun fyrir samstæðu OR fyrir árið 2016 og fimm ára áætlun fyrir árin 2017 til og með 2021 var samþykkt af stjórn OR í dag. Helstu dótturfélögin eru Veitur ohf, Orka náttúrunnar ohf (ON) og Gagnaveita Reykjavíkur ehf. (GR).
Aðhaldsaðgerðir í rekstri OR, Planið, sem gripið var til vorið 2011, höfðu um mitt ár 2015 þegar skilað betri sjóðstöðu en áformað var að ná í árslok 2016. Áframhaldandi aðhald í rekstri á sama tíma og tekjur vaxa skila góðri afkomu, minnkandi skuldum og traustari fjárhag.
Fjárfestingar OR samstæðunnar hafa aukist smátt og smátt frá árinu 2013. Á árinu 2016 lýkur uppbyggingu nýrra fráveitna á Vesturlandi og á árunum eftir það taka við hefðbundnari endurnýjunar- og nýfjárfestingar í veitukerfum. Sú ákvörðun var tekin síðla árs 2014 að OR eignist aftur mæla fyrir rafmagn og heitt og kalt vatn hjá viðskiptavinum á þjónustusvæði sínu. Mælarnir eru um 150.000 talsins.
Hjá ON eru helstu fjárfestingar tengdar Hellisheiðarvirkjun. Þar er unnið að því að viðhalda gufuöflun til rekstursins með tengingu við háhitasvæðið við Hverahlíð og með viðhaldsborunum. Jafnframt tengjast fjárfestingar ON umhverfisverkefnum á borð við að draga úr útblæstri brennisteinsvetnis og frágangi eftir framkvæmdaskeið síðasta áratugar.
Á árinu 2015 lýkur GR við útbreiðslu ljósleiðaranets fyrirtækisins til heimila í Reykjavík. Sú áratugareynsla sem nú er komin á ljósleiðaranetið hefur aukið mjög eftirspurn eftir þessum öflugustu gagnatengingum sem heimilum standa til boða. Fjöldi sveitarfélaga hefur óskað eftir samstarfi við GR og sér þess merki í fjárfestingaáætlunum fyrirtækisins.
Fjárhagsáætlun OR 2016 og fimm ára áætlun 2017-2021 er nú til umfjöllunar hjá Reykjavíkurborg sem hluti af áætlun samstæðu borgarinnar.
