Fyrsti laxinn 2022 úr Elliðaánum í morgun
20. jún 2022
Orkuveitan
Annar Reykvíkinga ársins landaði fyrsta laxinum úr Elliðaánum þetta sumarið í súldinni í morgun. Vel lítur út með veiðina meðal annars vegna þess að fyllingu og tæmingu Árbæjarlóns hefur verið hætt.
Það var býsna veiðilegt á bökkum Elliðaánna í morgun þegar Reykvíkingar ársins renndu þar fyrir lax, þokusúld, nokkuð vatn í ánum og talsvert af fiski genginn í þær. Það eru þau Kamila Walijewska og Marco Pizzolato sem Einar Þorsteinsson, formaður borgarráðs, kynnti sem Reykvíkinga ársins en sá siður hefur verið hafður á því árið 2011 að Reykvíkingar ársins opna árnar. Þau Kamila og Marco eru forsprakkar Freedge.org hér á landi. Það er alþjóðleg hreyfing hvers markmið er að draga úr matarsóun og byggja upp sterkara samfélag í kringum það að deila umframmat í gegnum frísskápa.
Kamila dró fyrsta fiskinn úr ánum úr Breiðunni á níunda tímanum í morgun. Útséð er þó með að hann rati í ísskápa freedge.org þar sem varlega er farið í veiðina í Elliðaánum. Einungis er veitt með flugu og öllum laxi skal sleppt. Þá kom fram hjá Jóni Þór Ólasyni, formanns Stangaveiðifélags Reykjavíkur í morgun að rannsóknir sýni að klak í ánum hafi á liðnu ári verið það besta á öldinni sem lofi góðu fyrir sumarið og framhaldið. Í vetur var frá því sagt að með því að rekstri Árbæjarlóns hafi verið hætt hafi klak hafist á ný í Árbæjarkvísl.
