OR hlýtur alþjóðleg verðlaun fyrir árangur í að jafna laun kynjanna

2. okt 2023

Ellen Ýr Aðalsteinsdóttir framkvæmdastýra mannauðs og menningar hjá OR
Ellen Ýr Aðalsteinsdóttir framkvæmdastýra mannauðs og menningar hjá OR

Orkuveita Reykjavíkur var nýverið verðlaunuð af samtökunum Rise & Lead Women fyrir árangur sinn í að jafna launamun kynjanna. Ellen Ýr Aðalsteinsdóttir framkvæmdastýra Mannauðs og menningar hjá OR tók við verðlaununum við hátíðlega athöfn í Haag fyrr í mánuðinum.

„Þetta er mikil viðurkenning fyrir okkur hér í samstæðunni en við höfum unnið markvisst að því að jafna launamun kynjanna. Sú vegferð hófst árið 2008 þegar sá munur mældist 8,4% hjá okkur en er í dag 0,2%,“ segir Ellen Ýr.

Yfirskrift verðlaunanna eru „Closing the Gender Pay Gap“ og bar verkefni Orkuveitunnar yfirskriftina „We Mind the Gap“. Tvö önnur fyrirtæki voru tilnefnd í þessum flokki og voru það Allianz SE og Sozial Holding.

Í umsögn dómnefndar segir að Orkuveitunni hafi tekist að jafna laun kynjanna með eftirtektarverðum hætti á aðeins örfáum árum. „Jafnlaunagreining fer fram hjá OR á tveggja mánaða fresti og hafa þau sett sér það markmið að óútskýrður launamunur kynjanna fari ekki yfir 1%.“

Francesca Donner, formaður dómnefndar sagði við þetta tilefni að það sem hafi heillað við OR hafi verið að fyrirtækið hefði sýnt mjög skýrt fram á árangur sinn með mælanlegum hætti. „Þá fagnar dómnefnd vegferð þeirra í þora að breyta víðtækum venjum með framsýnum verkefnum líkt og þessu og vera þannig fyrirmynd fyrir önnur fyrirtæki í Evrópu.“

Ebere Akadiri, stofnandi og forseti Rise & Lead Women lofsamaði einnig árangur fyrirtækisins þegar hún sagði: „Við getum ekki beðið eftir því að deila þessari sögu með umheiminum sem vonandi getur verið innblástur fyrir önnur fyrirtæki í að ná markmiðum sínum.“

Nánari upplýsingar um samtökin og verðlaunin má finna hér.

Jafnlaunalínurit - transparent.png
Orkuveitu Reykjavíkur tókst að loka kynbundnum launamun kynjanna árið 2017 og hefur hann haldist í kringum 0% síðan þá.