Stöðug afkoma OR
26. ágú 2019
Orkuveitan
Afkoma reksturs Orkuveitu Reykjavíkur á fyrri helmingi ársins 2019 var svipuð og undanfarin ár. Árshlutareikningur samstæðunnar var staðfestur af stjórn OR í dag. Innan samstæðunnar eru, auk móðurfélagsins, Veitur, Orka náttúrunnar og Gagnaveita Reykjavíkur.
OR Árshlutareikningur samstæðu H1 2019
Fjárfestingar í hámarki
Mikil uppbygging húsnæðis á helsta þjónustusvæði fyrirtækisins og endurnýjun burðaræða hitaveitu og vatnsveitu ráða miklu um að fjárfestingar voru miklar á fyrri helmingi ársins. Gangi spár eftir, mun heldur draga úr þörf fyrir að tengja nýtt húsnæði veitukerfunum og mörg stærstu endurnýjunarverkefnin eru langt komin. Því er útlit fyrir að það dragi úr fjárfestingum á næstu árum.
Fjárfestingar í rekstrarfjármunum innan samstæðu OR námu 7,7 milljörðum króna á fyrri helmingi ársins en voru 6,5 milljarðar á sama tímabili 2018. Viðhalds- og nýfjárfestingar í grænum orkukerfum á borð við virkjanir og hitaveitu eru á meðal umhverfisverkefna sem OR fjármagnar að hluta með útgáfu grænna skuldabréfa. Sú útgáfa hófst á fyrri hluta ársins og í þeim þremur útboðum sem fram hafa farið hefur eftirspurn verið talsvert umfram framboð og góð kjör fengist. Jafnframt er kaupendahópur bréfanna fjölbreyttari en í fyrri skuldabréfaútgáfu OR.
Bjarni Bjarnason, forstjóri:
Það er stöðugleiki í afkomu Orkuveitu Reykjavíkur og dótturfyrirtækjanna þótt við sjáum vissulega áhrif mikilla umsvifa í byggingageiranum. Útlit er fyrir að dragi úr slíkum fjárfestingum á næstu misserum. Framundan er allsherjar uppfærsla á notkunarmælum rafmagns og hita. Samdráttur heildarfjárfestinga verður því ekki eins mikill og ella.
Efnahagur Orkuveitu Reykjavíkur er traustur og þrátt fyrir þessar miklu fjárfestingar hækkar eiginfjárhlutfallið lítillega á fyrri hluta ársins.
Yfirlit stjórnenda
Lykiltölur fjármála
Fleiri lykiltölur fjármála OR-samstæðunnar eru birtar á vef Orkuveitu Reykjavíkur ásamt fjárhagslegum markmiðum sem unnið er eftir.
| H1 2015 | H1 2016 | H1 2017 | H1 2018 | H1 2019 | |
|---|---|---|---|---|---|
| Fjárhæðir í milljónum króna | |||||
| Rekstrartekjur | 20.479 | 20.955 | 21.612 | 23.167 | 23.502 |
| Rekstrarkostnaður | (7.443) | (8.215) | (8.063) | (8.626) | (9.571) |
| EBITDA | 13.036 | 12.741 | 13.549 | 14.541 | 13.931 |
| Afskriftir | (4.799) | (5.303) | (4.706) | (4.616) | (5.728) |
| Rekstrarhagnaður (EBIT) | 8.237 | 7.438 | 8.842 | 9.926 | 8.203 |
| Reiknaður tekjuskattur tímabilsins | 133 | (1.474) | (2.395) | (77) | 276 |
| Afkoma tímabilsins | 2.260 | 5.029 | 7.311 | 4.200 | 3.349 |
